ភ្នំពេញ៖ គម្រោងស្ពានឆ្លងទន្លេបាសាក់ពីចាក់អង្រែក្រោម ទៅព្រែកប្រា នឹងបើកការដ្ឋានសាងសង់នៅថ្ងៃទី១៩ ខែកុម្ភៈ ឆ្នាំ២០២៤ ខាងមុខនេះ ក្រោមអធិបតីភាពនាយករដ្ឋមន្ត្រីកម្ពុជា សម្តេចមហាបវរធិបតី ហ៊ុន ម៉ាណែត។

គម្រោងបើកការដ្ឋានសាងសង់ស្ពានឆ្លងទន្លេថ្មីមួយនេះ ត្រូវបានក្រសួងសាធារណការ និងដឹកជញ្ជូនបញ្ជាក់ឱ្យដឹងនៅក្នុងកិច្ចប្រជុំកាលពីព្រឹកថ្ងៃទី៣១ ខែមករា ឆ្នាំ២០២៤ ដែលដឹកនាំដោយរដ្ឋលេខាធិការក្រសួង លោក សួង ហេង។

ស្ពានឆ្លងកាត់ទន្លេបាសាក់ពីចាក់អង្រែក្រោម ទៅព្រែកប្រា និងផ្លូវតភ្ជាប់ ធ្វើឡើងក្រោមក្របខណ្ឌឥណទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន។

គម្រោងសាងសង់ស្ពាននេះនឹងជួយកាត់បន្ថយការកកស្ទះចរាចរណ៍ធ្វើដំណើរឆ្លងកាត់ស្ពានព្រះមុនីវង្ស ឆ្លងកាត់ទន្លេបាសាក់ ភ្ជាប់ផ្លូវជាតិលេខ១ ទៅច្បារអំពៅ។ ស្ពានឆ្លងទន្លេថ្មីនេះ ក៏នឹងជួយកាត់ជួយពន្លឿនការអភិវឌ្ឍតំបន់នោះ និងធ្វើឱ្យប្រសើរឡើងដល់ប្រសិទ្ធភាពនៃការដឹកជញ្ជូន និងភស្តុភារកម្មនៅតំបន់រាជធានីភ្នំពេញ។

គូសបញ្ជាក់ផងដែរថា រាជរដ្ឋាភិបាលក៏គ្រោងសាងសង់ស្ពានឆ្លងទន្លេចំនួន២ បន្ថែមទៀត គឺស្ពានមិត្តភាពកម្ពុជា-កូរ៉េខាងត្បូង និងស្ពានភ្ជាប់ផ្លូវល្បឿនលឿនពីភ្នំពេញទៅបាវិតផងដែរ៕